GWAJIMA "AFUNGUA" MKUTANO WA BONNKE DAR

Mchungaji Bonnke

Na Mwandishi maalum

MKUTANO wa Injili ambao inatarajiwa kuwa utahubiriwa na mhubiri maarufu duniani, Reinherd Bonnke wa Ujeruman, umeanza jioni leo (Agosti 21) jijini Dar es Salaam, huku Mchungaji Kiongozi wa Kanisa la “Ufufuo na Uzima”, Josephat Gwajima akipewa nafasi ya kuomba amani itawale katika mkutano huo na nchini kwa ujumla.

Gwajima, maarufu kama “Mzee wa Misukule” baada ya kukaribishwa jukwaani (madhabahuni) umati wa watu ulishangilia kwa nguvu. Mwenyekiti wa Kamati inayoratibu mkutano huo ni Askofu Magnus Mhiche. Mhiche ni makamu wa askofu mkuu wa Kanisa la Tanzania Assemblies of God (TAG).

Hata hivyo, ilielezwa kuwa mkutano huo utafunguliwa rasmi kesho (Alhamis) baada ya kuwasili kwa Bonnke anayetarajiwa kutua nchini usiku huu. Taarifa iliyotolewa mkutanoni ilisema Bonnke alichelewa kuwasili kutokana na ratiba ya ndege aliyosafiri nayo kubadilika.

Kanisa la “Ufufuo na Uzima” ni miongoni mwa makanisa yenye wafuasi wengi jijini Dar es Salaam. Imeelezwa kuwa, kupewa nafasi ya kuombea amani mkutano huo, kunatoa nafasi kwa waumini wa kanisa hilo ambalo kwa muda mrefu lilikuwa kama limetengwa na makanisa ya Kipentekoste, kuhudhuria mkutano huo.

Mchungaji Gwajima akiombea amani Taifa

Mbali na Askofu Mhiche, wengine katika kamati ya maandalizi ya mkutano huo ni; Katibu wa Baraza la Makanisa ya Kipentekoste Tanzania (PCT), Askofu David; Mwenyekiti wa PCT, mkoa wa Dar es Salaam na ambaye ni Mchungaji Kiongozi wa Kanisa la EAGT Mito ya Baraka, Bruno Mwakibolwa, Mchungaji Emmanuel Mwasota, Mchungaji Bathlomew Sheggah, na Mchungaji E. Ntepa.

Hivi karibuni Gwajima alipewa nafasi ya kuomba kwa ajili ya amani katika kongamano la maombi lililoratibiwa na PCT mkoa wa Dar es Salaam na kufanyika katika Kanisa la Efatha Mwenge. Kanisa hilo linaongozwa na Mtume na Nabii Josephat Mwingira. Kama ilivyo kwa Gwajima, Mtume na Nabii Mwingira naye kwa muda mrefu amekuwa akitazamwa na Wapentekoste kama “sio mpentekoste halisi”.

Baada ya tukio hilo kulitolewa kauli tofauti na viongozi wa PCT. Mwenyekiti wa PCT mkoa wa Dar es Salaam, Mchungaji Mwakibolwa pamoja na Katibu wa PCT Taifa, David Mwasota walisema kuwa, Mwingira na Gwajima walikuwa “wamerekebisha” mambo fulani ya kiimani, hivyo kustahili hata kujiunga katika PCT.

maelfu ya watu waliohudhulia mkutano

Mwakibolwa alikaririwa akisema kuwa, haoni kama kuna tatizo la kiimani kwa Mwingira na Gwajima kwani amewaona wote wananena kwa lugha. Mwasota yeye alikaririwa akienda mbali zaidi ambapo alidai kuwa, Mwingira hana tatizo tena na mchakato unafanyika wa kujiunga na PCT ila Gwajima kulikuwa na mambo kidogo ya kurekebisha kiimani.

Hata hivyo, siku chache baadaye Mwenyekiti wa PCT  Taifa, Askofu David Batenzi katika mahojiano na Fungukasasa.blogspot.com alisema kuwa, kilichotokea ni kwamba PCT mkoa wa Dar es Salaam waliomba tu kufanyia kongamano hilo katika Kanisa la Efatha kama ambavyo wangeomba kufanyia katika ukumbi unaomilikiwa na kanisa Katoliki, na jambo hilo halimaanishi kitu kingine.

Alikana kuwepo kwa mchakato wa mmojawapo wa watumishi hao kupeleka maombi ya kujiunga katika PCT. Alisema kuwa, kwa utaratibu wa kujiunga na PCT mwombaji hujaza fomu kisha huangaliwa misingi yake ya kiimani kama ni ya Kipentekoste au la.