Wapentekoste Tanzania wawatambua Mwingira na Gwajima

 

Na Sales Malula, Dar es Salaam.

BAADA ya kuwa wametengwa kwa muda mrefu na Baraza la Makanisa ya Kipentekoste Tanzania (PCT), ikidaiwa kuwa huduma zao zina utata, hatimaye Kiongozi Mkuu wa Huduma ya Efatha, Mtume na Nabii Josephat Mwingira pamoja na Kiongozi Mkuu wa Kanisa la “Ufufuo na Uzima”, Mchungaji Josephat Gwajima, maarufu kama “Mzee wa Misukule”, ‘wametakaswa.’

Kuthibitisha kuwa Wapentekoste sasa hawana tatizo tena na huduma ya watumishi hao wanaoongoza makanisa yenye wafuasi wengi (mega churches), Jumamosi ya Julai 20, 2013 PCT Mkoa wa Dar es Salaam wakishirikiana na PCT Taifa, waliandaa maombi maalum 

kwa ajili ya kuombea amani ya Taifa, ambayo 

yalifanyika katika Kanisa la Efatha, lililoko Mwenge, jijini Dar es Salaam na kuhudhuriwa na Wapentekoste kutoka madhehebu mbalimbali, wakiwemo wa Kanisa la “Ufufuo na Uzima” wakiongozwa na Gwajima mwenyewe.

Wengine walioshiriki ni Katibu Mkuu wa PCT Taifa, Askofu David Mwasota. Huyu pia ni askofu mkuu wa Kanisa la Naioth Gospel Assembly. Wengine ni Askofu Mkuu wa Kanisa la Church of God of Prophecy, Erick Mwambigija na Mwenyekiti wa PCT Mkoa wa Dar es Salaam, Askofu Bruno Mwakibolwa. Mwakibolwa pia ni mchungaji kiongozi wa Kanisa la Evangelistic Assemblies of God Tanzania (EAGT), Mito ya Baraka, Dar es Salaam. Kitaifa Kanisa la EAGT linaongozwa na Askofu Moses Kulola.

Mtume na Nabii Mwingira na mkewe, Eliakunda walishiriki kikamilifu katika maombi hayo, huku kwa nyakati tofauti wakipata nafasi ya kutoa neno. Eliakunda alizungumza huku  akitiririsha machozi.

Askofu Mwakibolwa aliliambia gazeti hili kuwa, hayo ni matokeo ya maombi ya Wapentekoste ya siku 40 kwa ajili ya amani ya Tanzania yaliyoanza Julai Mosi, mwaka huu ambayo yanayotarajiwa kuhitimishwa Agosti 11, mwaka huu. “Tunaomba kwa ajili ya kuja pamoja kama kanisa. Tunataka kanisa liwe na umoja,” alisema Mwakibolwa katika mahojiano na gazeti hili kwa njia ya simu, juzi Ijumaa.      

Kwa muda wa miaka mingi, hapa nchini huduma za kitume na kinabii katika Upentekoste zimekuwa hazipewi nafasi kubwa kutokana na sababu mbalimbali. Staili ya kuhubiri ya Mtume na Nabii Mwingira, ambayo huambatana na mizaha na vitendo vyenye kuibua maswali mengi, imewafanya baadhi ya Wapentekoste kutoiamini huduma ya mtumishi huyo.

Miongoni mwa vitendo hivyo ni; kupuliza spika wakati wa kuombea wagonjwa na kumwagia maji watu wakati wa kuwabatiza badala ya kuwazamisha kwenye maji mengi.

Vitendo vya mifano hiyo na vingine ambavyo hufanywa madhabahuni na Mtume na Nabii huyo maarufu anayetajwa kuwa miongoni mwa watumishi wenye utajiri mkubwa nchini, vinachochea baadhi ya Wapentekoste kuihukumu huduma yake kuwa iko nje ya misingi ya imani ya Kipentekoste.

Gwajima yeye pamoja na mambo mengine amekuwa akituhumiwa na Wapentekoste kuwa na imani inayodaiwa kuwa ni potofu, kutokana na mafundisho yake ya “kufufua misukule.” Baadhi ya Wapentekoste wamekuwa wakitilia shaka huduma na mafundisho hayo na hivyo kuhitimisha kuwa mafundisho ya mtumishi huyo yako kinyume na misingi ya imani ya Kipentekoste.

Upinzani ambao Mwingira na Gwajima wamekuwa wakiupata kutoka kwa Wapentekoste wenzao ni sawa na ule ambao aliwahi kukabiliana nao Askofu Mkuu wa Kanisa la Full Gospel Bible Fellowship (FGBF), Zachary Kakobe kwenye miaka ya mwishoni mwa 1990 hadi mwanzoni mwa 2000.

Katika kipindi hicho huduma ya Askofu Kakobe ambayo ilikuwa ikikokota makundi ya waumini kutoka makanisa mbalimbali, yakiwemo ya Kipentekoste, ilikuwa ikipigwa vita kali na Wapentekoste wenyewe, na wakati mwingine Kakobe kutuhumiwa kutumia ushirikina.

Ili ‘kumtakasa’ Askofu Kakobe kulifanyika kongamano kubwa kanisani kwake Mwenge, ambalo liliwashirikisha watumishi wa Mungu mbalimbali wa makanisa ya Kipentekoste, wakiwemo wenye ushawishi mkubwa, Askofu Moses Kulola na Emmanuel Lazaro. Hata hivyo, licha ya kuwepo kwa kauli za kuvunja ‘roho ya utengano’ na kutuhumiana mambo mbalimbali ya hovyo, lakini baada ya kongamano hilo Kakobe hakujiunga na PCT hadi leo.

Akizungumzia tukio hilo la Wapentekoste ‘kumtambua’, Mtume na Nabii Mwingira alisema kuwa, anawapongeza viongozi wote wa PCT kwa ujasiri wa kukubali kufanyia maombi kanisani kwake.

Hata hivyo, alisema: “Wote ambao mmekubaliana na jambo hili la umoja ili liweze kwenda ni lazima mkubali ‘kufa’. Kwahiyo hapa hakuna hata mmoja ambaye atatoka, lazima muweke saini watumishi wa Mungu kwenye kitabu changu (kitabu cha wageni). Wekeni saini zenu wote kama ishara ya kukubali ‘kufa’. Kwa kuwa jambo hili ni la Mungu mwenyewe, hakuna ambaye atalizimisha, lazima kanisa la Mungu liwe na umoja.”

Kutengwa na kupigwa vita kwa mitume na manabii kuliwasukuma kuanzisha umoja wao uliojulikana kama Umoja wa Mitume na Manabii Tanzania ambao ulikuwa chini ya uenyekiti wa Mwingira. Hata hivyo, umoja huo ulishindwa kuendelea kutokana na kilichoelezwa baadaye kuwa ni viongozi wa umoja huo “kutaka ukubwa na kupandisha chati huduma zao”.

Baada ya umoja huo kusambaratika Mwingira alijiunga katika umoja wa mitume na manabii wa Afrika. Mara kwa mara mitume na manabii kutoka nchi mbalimbali za Afrika wamekuwa wakifika katika Kanisa la Efatha kuhubiri na kutoa huduma za kinabii. Wanachama wa umoja huo wa mitume na manabii wa Afrika wana utajiri mkubwa.

Dalili za Mwingira kuanza kutambuliwa na Wapentekoste kama Mpentekoste mwenzao halisi, zilianza kuonekana mwanzoni mwa mwaka huu alipoalikwa na PCT kushiriki katika mkutano mkubwa wa Jukwaa la Wakristo Tanzania (TCF), uliofanyika katika Ukumbi wa Baraza la Maaskofu Katoliki Tanzania (TEC) Kurasini, jijini Dar es Salaam na kuhudhuriwa na maaskofu wapatao 177.

Mkutano huo ulikuwa unazungumzia madhila mbalimbali ambayo yanawakabili Wakristo ikiwemo baadhi ya Wachungaji kukamatwa na kuwekwa mahabusu na hata kufikishwa mahakamani kwa ‘kosa’ la kuchinja wanyama kwa ajili ya kitoweo; kutishwa, kujeruhiwa na kuuawa kwa viongozi wa dini ya Kikristo pamoja na kuchomwa moto na kuharibiwa kwa nyumba za ibada za Kikristo

Kauli ya PCT

Katika mahojiano na mwandishi wa habari hizi, Katibu Mkuu wa PCT, Askofu David Mwasota alisema: “Kwa ujumla hawa akina Mwingira na Gwajima ni Wapentekoste wenzetu. Hawana ujanja wa kwenda kwingine zaidi ya huku kwani imani wanayoiendesha ni ya Kipentekoste. Mchakato unaendelea wa kuwapokea kuwa wanachama wa Baraza la Makanisa ya Kipentekoste (PCT).

Hata hivyo, kuna vitu fulani fulani ambavyo wanapaswa kuvikamilisha ndio wawe wanachama. Lakini Mwingira kwa sasa yuko vizuri hivyo muda wowote anaweza kuwa mwanachama mwenzetu.

Kwa upande wa Gwajima kikwazo kikubwa kwa msingi wa imani yetu ni suala la misukule. Tulijaribu kumuuliza kama mambo ya misukule ni msingi wa imani ametujibu kuwa yeye ‘anafufua’ nafsi na sio msingi wa imani. Hivyo huyu naye muda wowote akiishakamilisha vigezo atakuwa mwanachama. Lengo letu ni kuhakikisha kuwa Kanisa la Kipentekoste linakuwa na umoja wa kweli”.

Alipoulizwa kama anamtambua Mwingira kuwa ni mtumishi wa Mungu, Askofu Mwasota alijibu: “Kwa hakika wote hawa Mwingira na Gwajima ni watumishi wa Mungu.” 

Gazeti hili lilipomtafuta Askofu Mwasota ili afafanue zaidi hakuweza kupatikana, baada ya kuelezwa kuwa baada ya ibada hiyo alisafiri nje ya nchi.

Mwenyekiti wa PCT Mkoa wa Dar es Salaam, Askofu Bruno Mwakibolwa alipoombwa na mwandishi wa habari hizi kuzungumzia juu ya PCT ‘kuwatakasa’ Mwingira na Gwajima na mtazamo wake kuhusu utumishi wao, alisema:  

“Tofauti lazima ziwepo, ila ninachojua umoja wa Kanisa ni jambo la muhimu, lazima watumishi tuungane kumhubiri Yesu na watu waokoke. Nilichokiona Mwingira amenena kwa lugha na Gwajima amenena kwa lugha, hivyo hawa ni wenzetu na kazi inaonekana”.

Alipoombwa kwa msisitizo kujibu iwapo Mwingira ni Mtumishi wa Mungu, Askofu Mwakibolwa alijibu: “Kinachotakiwa ni kumhubiri Yesu, mimi kama mwenyekiti wa PCT mkoa wa Dar es Salaam nimefanikisha kuwaunganisha watumishi wakubwa kama hawa, hivyo nikiwa na jambo la kuhubiri Yesu nikiwashirikisha watumishi kama hawa kazi inakuwa rahisi, hivyo ni wenzetu, hawa ni Wapentekoste”.

Baadaye Mwakibolwa katika mahojiano na gazeti hili kwa njia ya simu alisema: “Ni kweli maombi hayo tuliandaa PCT mkoa wa Dar es Salaam pamoja na PCT Taifa. Haya ni matokeo ya maombi ya siku 40 tunayoyafanya. Unajua lengo letu ni kuona tunakuja pamoja kama Wapentekoste. Tunaomba amani na kuona kanisa linakuja pamoja.

Unajua tangu nimekuwa mwenyekiti wa PCT mkoa wa Dar es Salaam ninaona Mungu anatuleta pamoja. Wewe bila shaka unafahamu hata TAG hawakuwa wanachama wa PCT lakini leo ni wanachama. Kama tunakaa na Wakatoliki kwenye Jukwaa la Wakristo (TCF) kwanini tusikae na hawa wenzetu?”

Alipoulizwa kuwa kwenye jukwaa wanakutana taasisi zinazowaunganisha Wakristo wanaopishana katika baadhi ya mambo ya msingi kiimani, lakini Mwingira na Gwajima wamekuwa wakilalamikiwa kuwa huduma zao zinaendeshwa kinyume na Upentekoste, sasa kwa kauli yake inamaanisha watumishi hao wamebadilika na kuendesha huduma zao Kipentekoste halisi, Askofu Mwakibolwa alisema:

“Mimi sioni kama kuna tatizo, nimewaona wakikemea dhambi na nimewaona wakinena kwa lugha. Unajua kama nilivyokueleza, tunataka tumhubiri Yesu Kristo tukiwa na unyoofu wa moyo, tuwe na upendo kama ilivyoandikwa katika Zaburi 33.” 

Andiko hilo linasema: “Mpigieni BWANA vigelegele, enyi wenye haki, Kusifu kunawapasa wanyofu wa moyo.”   

Mwingira aendeleza mizaha

Katika hali iliyoonesha kuwa Mwingira ni mtumishi asiyeishiwa mizaha, wakati akitoa neno la shukrani kwenye ibada hiyo ya kuombea Taifa, huku akicheka alimrushia utani Mchungaji Gwajima akisema: “Nina mashaka na usukuma wa Gwajima, maishani kwangu sijawahi kuona msukuma mfupi kama huyu (Gwajima). Nahisi kwa kuwa usukumani kuna machimbo ya dhahabu nahisi Wapare ‘walifanya fujo’.”

Mwingira hakufafanua kuhusu Wapare kufanya fujo. Inaaminika kuwa wanaume Wapare ni wafupi. Mwingira ni Mngoni. Kijadi Wangoni na Wasukuma ni watani. Gwajima hakuonekana kujali mzaha huo na badala yake alionekana kama mtu anayemtafakari Bwana.

Maombi yenyewe

PCT wameitisha maombi kwa ajili ya kulilia amani ya nchi. Maombi hayo ambayo ni kwa makanisa yote ya Kipentekoste nchini yalianza Julai, mosi mwaka huu na yanatarajiwa kuhitimishwa Agosti 11, mwaka huu.

Uamuzi wa kufanyika kwa maombi hayo nchi nzima ulifikiwa katika Mkutano Mkuu wa PCT uliofanyika mjini Dodoma, hivi karibuni. Mkutano huo ndio uliwapa nafasi ya kuendelea na uongozi Askofu Mwasota (Katibu) na Askofu David Batenzi (Mwenyekiti).

Ibada hiyo iliyofanyika Efatha Mwenge kuanzia saa tatu asubuhi hadi saa nane mchana, ilihudhuriwa na idadi kubwa ya waumini wa madhehebu ya Kipentekoste.

Ibada hiyo iliongozwa na Askofu Mwasota akishirikiana na watumishi wengine. Gwajima aliombea viongozi wa Taifa na mke wa Mwingira, Eliakunda aliombea kanisa liwe na umoja. Kabla ya kuomba alimwaga machozi akisema amekuwa akikerwa mno na hali ya kanisa kukosa umoja.